Заклинательные молитвы (ОТЧИТКИ )

Заклинательные молитвы (ОТЧИТКИ )
Молитва, сиесть заклинание Великаго Василия, к страждущим от демонов, и на всякую немощь
Господу помолимся. Господи помилуй.
Боже богов, и Господь господей, огненных чинов Содетелю, и невещественных сил Хитродетелю, небесных и земных Хитрче, Егоже никтоже от человек виде, ниже видети может; Егоже боится и трепещет вся тварь. Иже выю возвысивша иногда архистратига, и свое служение преслушанием отвергша, низвергни на землю, и отступники с ним ангелы, демоны бывшыя, в помрачения глубины тартара предавый: даждь заклинанию сему о страшнем Имени Твоем совершаемому, страху быти сему предводителю лукавствия, и всем полком его с ним снизпадшим от горняго светоношения, и обрати его в бегство, и запрети ему, и демоном его отступити конечно, да ничтоже вредно сопротивознаменанному образу соделает: но да приимут крепость державы сии запечатаннии, во еже ступати на змия и скорпия, и на всю силу вражию. Твое бо поется и величается, и от всякаго дыхания со страхом славится Всесвятое Имя, Отца и Сына, и Святаго Духа, ныне и присно, и во веки веком. Аминь.

Вторая молитва тогожде.
Господу помолимся. Господи помилуй.
Заклинаю тя, злоначальника хульнаго, начальника сопротивнаго востания, и самодетеля лукавства, заклинаю тя низверженнаго от горняго светоношения, и во тму глубины низведеннаго возношения ради. Заклинаю тя и всю низпадшую силу последовательную твоего произволения: заклинаю тя, душе нечистый, Богом Саваофом, и всем воинством ангел Божиих, Адонаи Елои Бога Вседержителя, изыди и разлучися от раба Божия (имярек), заклинаю тя Богом Словом вся создавшим, и Господом нашим Иисусом Христом, Единородным Сыном Его, прежде век неизреченно и безстрастно от Него рожденным, видимую же и невидимую тварь соделавшим, по образу Своему человека создавшим, законом первее естественне сия детоводившим, и ангельским приставлением сохраншим: водою согрешение свыше потопившим, и поднебесныя бездны разустившим, и гиганты нечествовавшыя растлевшим, и столп скверных растрясшим, и землю содомов и гоморров огнем жупельным испепелившим, егоже свидетель дым неугасимый курится; жезлом море раздельшим, и люди ногами немокрыми проведшим, и мучителя фараона, и воинство богоборное, во веки волнами нечестия брань потопившим; в последняя дни от Девы Чистыя Воплотившимся неизреченно, и целы печати чистоты сохраншим, омыти крещением древнюю нашу скверну благоизволившим, еюже мы преступлением осквернихомся. Заклинаю тя Крестившимся во Иордане, и образ нам нетления в воде по благодати Подавшим; Егоже ангели и вся силы небесныя удивишася, воплощенна Бога Смирившагося зряще, егда Безначальный Отец, безначальное Рождество Сыновнее откры, и Святаго Духа схождение, Троическое Единство свидетельствова. Заклинаю тя Оным, ветру Запретившим, и бурю морскую Укротившим, полк демонский Отгнавшим, и зеницы очныя от утробы лишенныя брением слепыя прозрети Соделавшим, и древнее рода нашего создание Обновившим, и немыя еже глаголати Исправившим: струпы проказ Очистившим, и мертвыя от гробов Воскресившим, даже до погребения человеком Беседовавшим, и ад востанием Пленившим, и все человечество необъято смертью Устроившим. Заклинаю тя Богом Вседержителем, Богодухновенным гласом человеки Вдохнувшим, и апостолом Содействовавшим, и всю вселенную благочестия Исполнившим: убойся, бежи, бежи, разлучися демоне нечистый и скверный, преисподний, глубинный, льстивый, безобразный, видимый безстудия ради, невидимый лицемерия ради, идеже аще ecи, или отъидеши, или сам ecи Веельзевул, или сотрясаяй, или змеевидный, или звероличный, или яко пара, или яко птица, или нощеглагольник, или глухий, или немый, или от нашествия устрашаяй, или растерзаяй, или наветуяй, или во сне тяжце, или и недузе, или в язве, или в смесе скоктаяй, или слезы любосластныя творяй, или блудный, или злосмрадный, или похотный, или сластотворный, или отраволюбивый, или любонеистовый, или звездоволхвуяй, или домоволшебник, или безстудный, или любопрительный, или непостоянный, или с месяцем пременяяйся, или временем неким сообращаяйся, или утренний, или полуденный, или полунощный, или безгодия некоего, или блистания, или по случаю сретился еси, или от кого послан еси, или нашел еси внезапу, или в мори, или в реце, или от земли, или из кладязя, или от стремнины, или от рова, или от езера, или от трости, или от вещества, или от верху земли, или от скверны, или от луга, или от леса, или от древа, или от птиц, или от грома, или от покрова баннаго, или от купели водныя, или от гроба идольскаго, или отнюдуже вемы, или не вемы, или от знаемых, или от незнаемых, или от непосещаемаго места, отлучися и пременися, устыдися образа рукою Божиею созданнаго, и воображеннаго: убойся воплощеннаго Бога подобия, и не сокрыйся в рабе Божием (имярек), но жезл железный, и пещь огненная, и тартар, и скрежет зубный, отмщение преслушания тебе ожидает. Убойся, умолкни, бежи, не возвратися, ни сокрыйся со инем лукавством нечистых духов: но отъиди в землю безводную, пустую, неделанную, на нейже человек не обитает: Бог Един призирает связаяй всех уязвляющих, и злосоветующих на образ Его, и веригами мрака, тартару предавый, в долгую нощь и день, тебе всех злых искусителя и изобретателя диавола. Яко велий есть отрок Божий, и велия слава Отца, и Сына, и Святаго Духа, ныне и присно, и во веки веком. Аминь

Молитвы заклинательные Святаго Иоанна Златоустаго
Боже Вечный, Избавивый род человеческий от пленения диавольскаго, избави раба Твоего (имярек) от всякаго действа духов нечистых, повели нечистым и лукавым духовом же и демоном отступити от души и тела раба Твоего (имярек), и не пребывати, ниже сокрытися в нем, да бежат Именем Твоим Святым, и Единороднаго Ти Сына, и Животворящаго Ти Духа, от создания руку Твоею: да очищен быв от всякаго искушения диавольскаго, преподобне и праведно и благочестно поживет, сподобляем Пречистых Тайн Единороднаго Сына Твоего и Бога нашего: с Ним же благословен ecи, и препрославен, с Пресвятым, и Благим, и Животворящим Ти Духом, ныне и присно, и во веки веком. Аминь.

Молитва иная тогожде.
Услыши ны Господи Боже, Спасителю наш, иже во утеснении души, и духа во унынии зовущих к Тебе, да не попустиши нас искуситися паче еже мощи носити, но сотвори со искушением и изводьство, во еже мощи нам носити. Избави нас от всякаго наведения исполнена злых, от скорби и утеснения лукавых духов, и сопротивныя силы. Поддержи немощь душ наших, и исправи ноги наша на путь правый, в познание истины, и еже в Тя упования. Утверди сердца наша, и даждь нам в совести чисте, со дерзновением проповедати слово Твое, и служити без упражнения во вся дни живота нашего. Яко Ты ecи обуреваемым пристанище, и еже в печалех утешение. И Тебе славу возсылаем, Отцу, и Сыну, и Святому Духу, ныне и присно, и во веки веком. Аминь.

Молитва иная тогожде.
Всем нечистым духовом запретивый, и силою глагола изгнавый легеона, явися и ныне Единородным Ти Сыном на создание, еже по образу Твоему сотворил ecи: и изми е насильствованное от сопротивнаго, да помилованное и очищенное сочинится святому Твоему стаду, и сохранится храм одушевлен Святаго Духа, и Божественных и Пречистых Святыней благодатию и щедротами и человеколюбием, Единороднаго Ти Сына: с Ним же благословен еси, и со Пресвятым, и Благим, и Животворящим Ти Духом, ныне и присно, и во веки веком. Аминь.

Молитва иная тогожде.
Призываем Тя, Владыко Боже Вседержителю, Вышний, Неискусимый, Мирный Царю: призываем Тя сотворшаго небо и землю, от Тебе бо произыде и альфа и омега, начало и конец, давый человеком в послушание четвероножная и безсловесная животная, яко Ты покорил еси та, Господи: простри руку Твою крепкую, и мышцу Твою высокую и святую, и присещеним посети создание Твое сие, и низпосли ему ангела мирна, ангела крепка, души и тела хранителя, иже запретит и отженет oт него всякаго лукаваго и нечистаго демона: яко Ты Господь Един Вышний Вседержитель, благословенный во веки веком. Аминь.

Молитва иная тогожде.
Божественное же и святое, и великое, и страшное, и нестерпимое именование и призывание творим на твое прогнание, отступниче, такожде и запрещение на твое погубление, диаволе. Боже Святый, Безначальный, Страшный, Невидимый Существом, Неприкладный Силою, и Непостижимый Божеством, Царю Славы, и Вседержителю Владыко, запрещает ти, диаволе, от не сущих, во еже быти вся благолепно словом составивый, ходяй на крылу ветреню. Запрещает ти, диаволе, Господь, Призываяй воду морскую, и Изливаяй сию на лице всея земли, Господь Сил Имя Ему. Запрещает ти, диаволе, Господь, от безчисленных небесных чинов огненных, страхом служимый и воспеваемый, и от множества ликов ангельских и архангельских, с трепетом покланяемый и славимый. Запрещает ти, диаволе, Господь, окружаемый от окрест предстоящих сил, и страшных шестокрыльных и многоочитых херувимов и серафимов, лица своя двема крилома покрывающих, незримаго ради Его и неизследимаго Божества, и двема крилома своя ноги покрывающих, по еже не опалитися от неизреченныя славы, и недомыслимаго величества Его, и двема крилома летающих, и небо исполняющих от вопля своего: Свят, Свят, Свят, Господь Саваоф, исполнь небо и землю славы Его. Запрещает ти, диаволе, Господь, от недра Отча сошедый с небес Бог Слово, и от Девы Святыя поклонным неизреченным, и пречистым Воплощением неизглаголанно явивыйся в мiре, еже спасти его, и Владычнею Своею силою свергий тебе с небес, и отметна всячески показавый. Запрещает ти, диаволе, Господь, рекий морю, умолкни, престани: и повелением абие преста. Запрещает ти, диаволе, Господь, пречистым плюновением брение совторивый, и лишенный уд от рождения слепому создавый, и свет даровавый. Запрещает ти, диаволе, Господь, дщерь архисинагогову словом оживотворивый, и вдовича сына из уст смерти восхитивый, и своей его матери цела и здрава даровавый. Запрещает ти, диаволе, Господь, Лазаря из мертвых четверодневна нерастленна яко не умерша и безвредна, во удивление многим представивый. Запрещает ти, диаволе, Господь, заушением клятву испразднивый. и копием Пречистых Ребр Своих, райское хранящее пламенное оружие отставивый. Запрещает ти, диаволе, Господь, заплеванием Честнаго Своего начертания всякую слезу от всякаго лица отерый. Запрещает ти, диаволе, Господь, водрузивый крест на утверждение едино и спасение мiра, в падение же твое, и всех под тобою аггелов. Запрещает ти, диаволе, Господь, давый глас на кресте Своем, и завеса храма раздрася, и камение разседошася, и гробы отверзошася, и от века умершия восташа. Запрещает ти, диаволе, Господь, смертию смерть умертвивый, и живот востанием Своим человеком даровавый. Запрещает ти, диаволе, Господь, сошедый во ад, и гробы его истрясый, и всех в нем содержимых связанных свободивый, и к Себе воззвавый: Егоже вратницы видевше ужасошася, и подвижницы адовы крыющеся исчезоша. Запрещает ти, диаволе, Господь, из мертвых воскресый, Христе Боже наш, и всем воскресение Свое даровавый. Запрещает ти, диаволе, Господь, на небо со славою вознесыйся ко Отцу Своему, и одесную Величествия на Престоле Славы Седяй. Запрещает ти, диаволе, Господь, паки грядый со славою на облацех небесных, со святыми ангелы Своими судити живым и мертвым. Запрещает ти, диаволе, Господь, огнь неугасимый, и червь неусыпаемый, и тму кромешную уготовавый тебе в вечную муку. Запрещает ти, диаволе, Господь, Егоже вся боятся и трепещут от лица силы Его, яко нестерпим есть гнев, еже на тебе прещения Его. Той запрещает ти, диаволе, Господь, страшным Своим Именем: устрашися, вострепещи, убойся, разлучися, истребися, бежи, падый с небесе, и с тобою вси лукавии дуси, всякий дух лукавый, дух нечистоты, дух лукавства, дух нощный и дневный, полуденный же и вечерний, дух полунощный, дух мечтанный, дух сретательный, или земный, или водный, или в дубравах, или в трости, или в стремнинах, или во двопутиях, и трепутиях, во езерах, или реках, в домах, во дворех, и в банях преходяй и вреждаяй, и изменяяй ум человеческий: вскоре разлучитеся от создания Создателя Христа Бога нашего, и отлучитеся от раба Божия (имярек), от ума, от души, от сердца, от утроб, от чувств, и от всех удов его, во еже быти ему здраву и всецелу, и свободну, знающу своего Владыку и Зиждителя всех Бога, собирающа заблуждающия, и дающа им печать спасения, рождением и обновлением Божественнаго Крещения, во еже сподобитися ему Пречистых и Небесных, и Страшных Его Таинств, и соединитися стаду Его истинному, на месте злачне вселяющуся, и на воде упокоения питаему, и палицею креста спасительно и известно наставляему, во оставление грехов и в жизнь печную. Яко Тому подобает всякая слава, честь, и поклонение, и великолепие, со Безначальным Его Отцем, и с Пресвятым, и Благим, и Животворящим Его Духом, ныне и присно, и во веки веком. Аминь.